《聽日九月一日，一齊比個藉口比自己去發奮》
" 同學各位，找個位，這是你的開學禮......"
一句耳熟能詳嘅歌詞，每次聽到腦海都浮現出讀書時嘅回憶畫面，歌曲之中令人有點期待。
聽日九月一日，對讀緊書嘅你，結束漫長嘅暑假，可能係痛苦嘅開始。對做緊野嘅你亦都肯定係痛苦嘅等待(等五日先可以放假，有啲仲慘，要返足六日)，但對我嚟講，係一個新嘅開始。
每次接近暑假尾聲，都慨嘆點解咁快就完!?總覺得好似好多野仲未玩仲未做(但明明個暑假玩到無野好玩)，依家小學雞應該仲存在暑期作業依樣野吧? 以前小學雞時代，真係好認真咁去做暑期作業，學校唔想比我地搵到答案，於是就揀一啲好偏門好少出版嘅暑期作業，務求我地係街外搵唔到，不過身邊總有同學會搵到答案，但每次交完暑期作業之後，學校都好似無咗回事咁，畢業嗰陣，經過教員室，見到門外一堆暑期作業放置咗喺到好幾年，我就知道認真做暑期作業係一件搵笨柒嘅行為。
中學，除咗同身邊嘅同學仔呻下要開學，之後夾下聽日幾點邊到等一齊返學之外，大家內心仍然對「開學」充滿期待。返學朝八晚三，一點正常放飯，生活作息開始變返正常而規律。最期待莫過於「坐咩位」，坐喺男神隔離定坐喺女神隔離呢? 今年班主任係邊個八公八婆呢? 今年會唔會有靚仔阿Sir靚女Miss教呢? 聽日開學禮通常返半日，放學去唔去唱K好呢? 好多好多期待.....
但其實都可以比自己一個發奮機會，唔洗等到2015年1月1日先開始。
今年九月一日咁岩撞正星期一，新月份，新星期，亦都係我份新工開始。上年大學畢業出嚟做野岩岩好一年，終於體會到捨棄學生身份，變成上班族嗰種痛苦非筆墨能形容，每日都懷念以前讀書日子，感覺好似未玩夠咁。
但現實歸現實，人始終要大，返咗一年工，初時真係唔多適應，但慢慢做得得心應手，挑戰性都慢慢降低，慢慢變成一部"返工放工嘅機噐"，每日都問自己"今日做過咩嚟? "，雖然人工高，準時放工，但唔想咁後生就變退休生活咁，有人話畢業後嗰段黃金十年，係人生博殺期，既然係咁，我決定離開「舒服區」，轉到一份極俱挑戰性，極辛苦，極無私人時間，但有好多野學同充實日子嘅工，可能我某一日會頂唔順而後悔，我唔知，我只係知我想轉下工作環境。上年畢業後搵工搵咗一段時間，面試咗好多公司，有時侯仲比對方冷言冷語，曾經我係雨中發誓，" 邊個肯請我，我一定將佢間公司發揚光大 " ，因為咁，我都唔選擇離開，如今終於有機會實踐上年誓言，希望我可以捱到落去。
返緊工嘅你生活上過得有意義嗎? 有冇為五斗米折腰而忘記當年理想?
讀緊書嘅你校園上過得充實嗎? 有冇為你人生將近完結嘅讀書生涯而燃燒你嘅青春? 有冇為你將來打算而堅持每日溫書應付公開試嗎? 有冇為你鐘意嘅人而盡力追求對方表明心跡?
開學前夕，今日好好諗下，好好計劃一下，比個藉口自己去發奮。
開頭嗰句歌詞係 " 同學各位，找個位，這是你的開學禮 "
希望大家好似下一句歌詞咁 "望前看想像戴著四方帽時多美麗" 有一個新開始。
祝大家聽日有個新開始，都祝聽日正式踏入上班族嘅" 好朋友" 工作順利，大個女喇 哈哈!放心，好快就會同你出嚟食飯!
都祝自己面對新工作新環境而努力。
大家一齊加油。(我唔會放棄寫故架!!!)
PS 大家嚟緊有咩目標? 可以留下言，為自己留下一個紀錄，一年後睇返睇下有冇實現到?
Search